நாட்டை இராணுவ மயமாக்க முயற்சி


நாட்டில் பொருளாதார நெருக்கடி அதிகரித்திருக்கும் சூழ்நிலையில் அரசாங்கம் நாட்டை இராணுவ மயமாக்க முயற்சி செய்து வருவதாக எமக்கு சந்தேகம் நிலவுகின்றது என மலையக மக்கள் முன்னணியின் தலைவரும் நுவரெலியா மாவட்ட பாராளுமன்ற உறுப்பினருமான வே.இராதாகிருஷ்ணன் தெரிவிக்கின்றார்.


மலையக மக்கள் முன்னணியின் ஸ்தாபகத் தலைவர் அமரர் பெ.சந்திரசேகரனின் 12 வது சிரார்த்தத் தினம் நேற்று (01) பதுளையில் உள்ள மலையக மக்கள் முன்னணி தலைமைக் காரியாலயத்தில் அனுடிக்கப்பட்ட போது நிகழ்வின் பிரதம அதிதியாக கலந்து கொண்டு உரையாற்றிய போதே அவர் மேற்கண்டவாறு குறிப்பிட்டார்.


அங்கு மேலும் கருத்து தெரிவித்த அவர், நாட்டின் அனைத்து திணைக்களங்களினதும், அரச நிறுவனங்களினதும் செயலாளர் பதவிகள் அரச நிர்வாக சேவை அதிகாரிகளிடம் ஒப்படைக்கப் படுவதற்கு பதிலாக ஓய்வுபெற்ற இராணுவ உயரதிகாரிகளிடமே ஒப்படைக்கப்பட்டுள்ளன.


இராணுவ அதிகாரிகள் நன்றாக யுத்தம் செய்யும் திறமைப் பெற்றவர்கள் என்பதில் மாற்றுக் கருத்தில்லை.எனினும் அரச நிர்வாக சேவை உத்தியோகத்தர்கள் போன்று பொருளாதார ரீதியாக தீர்மானம் எடுக்கக் கூடிய அனுபவமும், இயலுமையும் அவர்களிடம் இல்லை. இதன்காரணமாக இன்று நாடு அதாள பாதாளத்தில் வீழ்ந்து மீண்டு எழ முடியாத நிலையில் உள்ளது. அனைத்து துறைகளும் இராணுவத்திடம் ஒப்படைக்கப்பட்டுள்ளமையால் இராணுவமயத்திலிருந்து மீண்டு ஜனநாயகத்தை நிலைநாட்ட நாட்டு மக்கள் ஒன்றுத் திரண்டு வீதிக்கு இறங்கி போராட வேண்டும்.


மத்திய வங்கியின் ஆளுநர் நாட்டின் பொருளாதார பிரச்சினையைத் தீர்க்க நாணயத் தாள்களை அச்சடித்து வெளியிடுவதை தொழிலாக செய்து வருகின்றார். இதனால் பணவீக்கம் அதிகரித்து டொலருக்கான பெறுமதியை இலங்கை ரூபாய் இழந்து, டொலருக்கான தட்டுப்பாடு அதிகரித்துள்ளது. இந்நிலை தொடர்வதால் அத்தியாவசிய பொருட்களுக்கான இறக்குமதி இன்றி, நாட்டில் பொருட் தட்டுப்பாடு ஏற்பட்டு பால்மா,காஸ், கோதுமை என அனைத்துப் பொருட்களுக்கும் வரிசையில் (கியூவில்) நிற்க வேண்டிய நிலை ஏற்பட்டுள்ளது. நாட்டில் எல்லாத் துறைகளிலும் ஊழல் மோசடி தலைவிரித்தாடுகின்றது.


புது வருடம் பிறக்கிறது என்றால் முன்னர் மக்கள் எவ்வாறு புதிய திட்டங்களை நடைமுறைப்படுத்தலாம் என யோசிப்பர், ஆனால் இப் புது வருடத்தில் பொருட்களை இலகுவில் வாங்க எந்த வரிசைக்கு செல்லலாம் என யோசிக்கத் தொடங்கி விட்டனர்.


மலையக மக்கள் முன்னணியின் ஸ்தாபத் தலைவர் அமரர் சந்திரசேகரனின் மறைவிற்கு பின்னர் ம.ம.முன்னணி என்ற கட்சி இல்லாது போய்விடும் எனப் பலர் கனவு கண்டனர். ஆனாலும் அவரது கொள்கை அரசியலில் பற்றுக் கொண்ட ஸ்தாப உறுப்பினர்கள் உரிமை அரிசியலுக்காக அவர் ஆரம்பித்த கட்சியை கட்டிக்காத்து என்னையும் வீழ்த்தி விடாமல் சமூக நோக்கத்திற்காக அயராது பாடுபட்டு வருகின்றனர்.


நான் தலைவராக வராவிட்டாலும் அமரர் சந்திரசேகரனின் சுயநலமற்ற சமூக எழுச்சிக் கொள்கையில் பிடிப்புக் கொண்ட ஒருவர் இவ்வமைப்பின் தலைவராக வந்திருப்பார். நேர்மையான தலைவனின் கொள்கைகள் மரணிப்பதில்லை என்பதற்கு நம் தலைவர் உதாரணமாக இருக்கின்றார்.


பதுளை மாவட்டத்தில் இருந்து தெரிவான பாராளுமன்ற உறுப்பினர் என்ன நோக்கத்திற்காக பிரிந்து சென்றார். அவரது சுயநல அரசியல் எப்படியானது என்று நான் புதிதாக கூறத் தேவையில்லை. எமது முன்னணியின் செயலாளர் நாயகம் பேராசிரியர் விஜயச்சந்திரன் பதுளை மாவட்டத்தை பிறப்பிடமாகக் கொண்ட புத்திஜீவி, இதுவரை காலமும் பதுளை, நுவரெலியா மாவட்ட எமது முன்னணி உறுப்பினர்கள் இணைந்து செயற்பட போடப்பட்ட தடை தற்போது தகர்த்தெறியப்பட்டுள்ளது.


எதிர்கால பாராளுமன்றத் தேர்தல்களில் விஜயச்சந்திரன் தமிழ் முற்போக்கு கூட்டணியில் களமிறங்கி வெற்றி பெறுவது உறுதி. நாட்டில் ஏற்பட்டுள்ள இனவாதத்திற்கு முற்றுப்புள்ளி வைக்க சிறுபான்மை தமிழ் கட்சிகள் ஒன்றிணைந்து செயற்பட ஆரம்பித்துள்ளன.


13வது அரசியல் அமைப்புச் சட்டம் மூலம் எமது உரிமைகள் உறுதிப்படுத்தப்பட்டு நிர்வாக கட்டமைப்புக்குள் அரசியல் உரிமைகளை வென்றெடுக்க பதுளை மக்களும் ஒத்துழைப்பு நல்கி பங்குதாரர்கள் ஆக வேண்டும்.


மலையக தொழிலாளர்களின் தொழிற்சங்க ரீதியான பிரச்சினைகள், தொழில் அழுத்தங்கள், சம்பள பிரச்சினை என்பவற்றை தீர்க்க நாம் ஒன்றுபடுவோம்.


அரசாங்கத்திற்கு வாக்களித்த 69 இலட்சம் மக்களில் இன்று எவரும் அரசாங்கத்துடன் இல்லை எனவே நாம் விரைவில் புதிய அரசியல் மாற்றத்திற்கு தயாராகி, இழந்த உரிமைகளை வென்றெடுக்க ஓரணியில் திரள்வோம் என அழைப்பு விடுக்கின்றேன் என்றார்.

No comments:
Write comments