பாடசாலைகளை மீள ஆரம்பித்தல் தாமதமடையும் என கல்வி அமைச்சு அறிவிப்பு




  மினுவாங்கொடை நிருபர் )


    பாடசாலைகளை மீள ஆரம்பித்தல் தாமதமடையும் என, கல்வி அமைச்சின் செயலாளர் பேராசிரியர் கபில சீ. பெரேரா தெரிவித்துள்ளார்.
   சிங்கள ஊடகம் ஒன்றின் கேள்விக்கு பதிலளிக்கும் போதே அவர் இவ்வாறு குறிப்பிட்டுள்ளார்.
   இரண்டாம் தவணை பாடசாலை விடுமுறை முடிந்து மீண்டும் எதிர்வரும் 9 ஆம் திகதி பாடசாலைகளை மீள ஆரம்பிக்கத் திட்டமிட்டிருப்பினும், தற்போது பரவி வரும் கொரோனாத் தொற்று காரணமாக உரிய திகதியில் பாடசாலைகளை மீள திறக்க முடியாது போகும் என்றும் அவர் குறிப்பிட்டுள்ளார்.
 பாடசாலைகளை மீள ஆரம்பிப்பது தொடர்பாக, சுகாதார அதிகாரிகளிடம் பரிந்துரைகளைக் கேட்டுள்ளதாகவும், சுகாதாரப் பரிந்துரைகளின் அடிப்படையில் பாடசாலைகளை மீள ஆரம்பிப்பது தாமதமடையும் என்றும் அவர் குறிப்பிட்டுள்ளார். 122 பிரதேசங்களுக்கு பொலிஸ் ஊரடங்கு அமுல்படுத்தப்பட்டுள்ளதோடு, மாணவர்களும் இத்தொற்றுக்கு இலக்காகியுள்ளனர்.
   மாணவர்களின் செயற்பாடுகளுக்கு எந்த விதப் பாதிப்புக்களும் ஏற்படாதிருக்க, மீண்டும் தொலைக்கல்வி நடவடிக்கைகளை ஒழுங்குபடுத்தும் வகையில் அரம்பிக்கத் திட்டமிட்டுள்ளதாகவும், வசதிகள் குறைந்த கிராமியப் பிரதேச மாணவர்களுக்கும் இந்த வாய்ப்பை வழங்கும் வகையில் விசேட வேலைத் திட்டத்தைத் தயாரிப்பதாகவும் அவர் குறிப்பிட்டுள்ளார்.
   அக்டோபர் 9 ஆம் திகதி பாடசாலைகளுக்கு விடுமுறை வழங்கப்பட இருந்த போதிலும், கொரோனாத் தொற்று காரணமாக பாடசாலைகளின் இரண்டாம் தவணை விடுமுறையை அக்டோபர் 5 ஆம் திகதி வழங்கப்பட்டது.
   உயர்தரப் பரீட்சை முடிவடைந்ததும், மூன்றாம் தவணை நவம்பர் 9 ஆம் திகதி ஆரம்பமாகி, டிசம்பர் 23 வரை நடாத்துவதற்குத் திட்டமிடப்பட்டிருந்தமை குறிப்பிடத்தக்கது.

( ஐ. ஏ. காதிர் கான் )